Sunday, July 5, 2015

KOCHA WA ARGENTINA ADAI BAHATI HAIKUWA UPANDE WAO BAADA YA KULIKOSA TAJI LA COPA AMERICA.

KOCHA wa timu ya taifa ya Argentina, Gerardo Martino amesema kikosi chake kilikosa bahati kufuatia kupoteza mchezo wao wa fainali ya michuano ya Copa America dhidi ya Chile jana na kudai yuko nyuma akiwaunga mkono wachezaji wake. Argentina walilikosa taji hilo baada ya kupoteza mchezo huo kwa wenyeji Chile kwa changamoto ya mikwaju ya penati baada ya timu hizo kutoka sare ya bila kufungana katika muda wa kawaida na ule wa nyongeza. Akihojiwa Martino amesema hawakucheza vile walivyozoea na hata wapinzani wao pia kwa timu hizo mbili zilifanikiwa kwa kiasi kikubwa ya kupunguza kasi ya mwenzake. Kocha huyo aliendelea kudai kuwa kutokana na hilo sio kikosi chake au Chile waliotengeneza nafasi za kutosha kwa ajili ya kufunga. Hiyo inakuwa mara ya pili kwa Argentina kunyang’anywa tonge mdomoni kwa miezi 12 iliyopita walijikuta wakitoka vichwa chini baada ya kufungwa na Ujerumani katika fainali ya Kombe la Dunia nchini Brazil. Mara ya mwisho Argentina kunyakuwa taji kubwa la kimataifa ilikuwa miaka 22 iliyopita na sasa inaonekana itabidi waendelee kuvumilia zaidi ili kukata kiu yao hiyo.


MASHABIKI WA ATLETICO HAWATAMSAMEHE DE GEA AKIJIUNGA NA MADRID - UJFALUSI.

BEKI wa zamani wa Atletico Madrid, Tomas Ujfalusi anaamini mashabiki watachukulia uhamisho wa zao lao kutoka timu ya vijana David De Gea kwenda Real Madrid kama dalili za usaliti. De Gea amekuwa akihusishwa na tetesi za kuhamia Madrid kipindi hiki cha majira ya kiangazi akitokea Manchester United pamoja na kukuzwa na Atletico toka akiwa na umri wa miaka 13 na kufanikiwa kushinda taji la Europa League pamoja na Super Cup akiwa na kikosi cha kwanza. Akihojiwa kuhusiana na hilo Ujfalusi ambaye ameitumikia timu hiyo kuanzia mwaka 2008 mpaka 2011 amesema kamwe mashabiki wa Atletico hawatamsamehe kama akijiunga na mahasimu wao Madrid. Beki huyo wa kimataifa wa Jamhuri ya Czech pia amedai anashangazwa na taarifa hizo kwani anamfahamu De Gea kuwa mshabiki wa Atletico toka akiwa na umri mdogo hivyo utakuwa sio uamuzi rahisi kuchukua.

FIJI YASHINDA MABAO 38-0 KATIKA MCHEZO WA SOKA.

KISIWA cha Fiji kimefanikiwa kuvunja rekodi kubwa katika historia ya michuano ya bara la Pacific kwa ushindi wa mabao 38-0 dhidi ya Micronesia leo. Katika mchezo huo Fiji ilifunga mabao 21 katika kipindi cha kwanza huku mengine 17 wakimalizia katika kipindi cha pili na Atonio Tuivuna akiibuka shujaa wa mchezo kwa kufunga mabao 10 peke yake. Ushindi huo umeifanya Fiji kupata matumaini ya kufuzu michuano ya Olimpiki itakayofanyika jijini Rio de Janeiro mwakani pamoja na kwamba Micronesia sio mwanachama wa Kamati ya Kimataifa ya Olimpiki-IOC. Hiyo ni mara ya pili kwa Micronesia kupokea kipigo kizito katika michuano hiyo ya ukanda wa Oceania baada ya siku mbili zilizopita kutwishwa mabao 30-0 na Tahiti hivyo kuzima ndoto zao za kusonga mbele katika kundi A. Hata hivyo kutokana na Micronesia kutokuwepo katika orodha za viwango vya Shirikisho la Soka Duniani-FIFA, Australia ndio itabakia nchi pekee katika historia kupata matokeo makubwa katika mchezo wa kimataifa waliopoitandika Samoa kwa mabao 31-0 katika mchezo wa kufuzu Kombe la Dunia mwaka 2002.

PALACE YATHIBITISHA KUMUWINDA CABAYE.

MWENYEKITI msaidizi wa Crystal Palace, Steve Parish amethibitisha kuwa klabu hiyo inataka kumsajili Yohane Cabaye kutoka klabu ya Paris Saint-Germain-PSG. Inaaminika meneja wa Palace Alan Pardew anataka kuungana tena na kiungo huyo wa zamani wa Newcastle United aliyekuwa akimfundisha wakati akiwa St James Park. Tayari kuna taarifa kuwa Roma nao tayari wameulizia uwezekano w kumsajili nyota huyo majira haya ya kiangazi lakini Parish anaamini watashinda katika mbio hizo. Parish amesema mipango yao ni kuhakikisha wanapata nafasi 10 za juu katika msimamo wa Ligi Kuu msimu ujao hivyo ni lazima walete wachezaji bora watakaoweza kufanikisha hilo.

GERRARD ATAMBULISHWA RASMI GALAXY.

NAHODHA wa zamani wa kimataifa wa Uingereza, steven Gerrard amekutana na mashabiki wake wapya wakati alipotambulishwa katika klabu ya Los Angeles Galaxy kwa mara ya kwanza jana akitokea Liverpool kwa uhamisho huru. Gerrard ambaye pia alikuwa nahodha wa Liverpool aliibuka uwanjani na kuwatakia mashabiki wa Galaxy heri katika sherehe za Julai 4 ambazo husheherekewa nchini kote Marekani huku timu yake ikifanikiwa kuichapa Toronto kwa mabao 4-0. Akizungumza alipopewa kipaza sauti wakati wa mapumziko Gerrard aliwaambia mashabiki hao kuwa anajisikia furaha kuwa nao na ana hamu kubwa ya kuvaa jezi ya timu hiyo na kuanza kuwatumikia. Gerrard atakutana tena na mchezaji mwenzake wa zamani wa Liverpool Robbie Keane ambaye aliibuka nyota ya mchezo kwa kufunga mabao matatu-hat-trick jana.

KESHI ATUPIWA VIRAGO NIGERIA.

SHIRIKISHO la Soka la Nigeria-NFF limetengua mkataba wa kocha wa timu ya taifa ya nchi hiyo, Stephen Keshi baada ya Kamati ya Utendaji ya shirikisho hilo kukutana katika kikao cha dharura jijini Abuja. Katika taarifa yake shirikisho limedai kufuatia taarifa zilizowasilishwa na kamati ya nidhamu, ufundi na maendeleo wameamua kusitisha ajira ya Keshi kutokana na mambo kadhaa kubwa ikiwa ni kutokuwa na moyo wa dhati wa kufanya kazi hiyo. Keshi amekuwa chini ya shinikizo toka taarifa zivuje kuwa aliomba kibarua cha kuinoa timu ya taifa ya Ivory Coast na hilo ndio linahisiwa kuwa jambo kubwa lililomfukuzisha kazi. Kikosi cha nchi hiyo maarufu kama Super Eagles sasa kitaongozwa na aliyekuwa kocha msaidizi Salisu Yusuf kwa muda huku kamati ya ufundi ikiongozwa na Shuaibu Amodu mpaka hapo atakapopatikana kocha mpya. Keshi mwenye umri wa miaka 53, alianza kuinoa Super Eagles mwaka 2011 huku akifanikiwa kushinda taji la Mataifa ya Afrika mwaka 2013.

SDL KUANZA OKTOBA 17.

KWA kuzingatia marekebisho ya Kanuni ya Ligi Daraja la Pili (SDL) yaliyofanywa na Kamati ya Utendaji ya Shirikisho la Mpira wa Miguu Tanzania (TFF) hivi karibuni, SDL kwa msimu wa 2015/2016 itachezwa katika makundi manne ya timu sita sita kwa mtindo wa nyumbani na ugenini. Timu itakayoongoza kundi itacheza Ligi Daraja la Kwanza (FDL) msimu wa 2016/2017 wakati ya mwisho katika kila kundi itarudi kucheza Ligi ya Mkoa wake kwa msimu wa 2016/2017. Makundi ya SDL ni kama ifuatavyo; Kundi A ni Abajalo FC (Tabora), Singida United (Singida), Mvuvuma FC (Kigoma), Milambo FC (Tabora), Green Warriors (Dar es Salaam) na Transit Camp (Dar es Salaam). Timu zinazounda kundi B ni Bulyanhulu FC (Shinyanga), JKT Rwamkoma (Mara), Pamba FC (Mwanza), AFC Arusha, Madini FC (Arusha) na Alliance Schools (Mwanza). Kundi C ni Kariakoo (Lindi), Mshikamano FC (Dar es Salaam), Cosmopolitan (Dar es Salaam), Abajalo FC (Dar es Salaam), Changanyikeni Rangers (Dar es Salaam) na Villa Squad (Dar es Salaam). Nazo African Wanderers (Iringa), Mkamba Rangers (Morogoro), Town Small Boys (Ruvuma), Wenda FC (Mbeya), Coca-Cola Kwanza FC (Mbeya) na Sabasaba United (Morogoro) zitakuwa kundi D. Klabu nyingi bado hazijatuma jina la uwanja wa nyumbani, hivyo zinakumbushwa kufanya hivyo haraka ili kurahisisha upangaji wa ratiba. Ligi Daraja la Pili (SDL) msimu wa 2015/2016 inatarajia kuanza Oktoba 17 mwaka huu.