Wednesday, February 10, 2016

TETESI ZA USAJILI ZILIZOJIRI HUKO MAJUU.

KLABU ya Manchester United inajipanga kutoa ofa ya paundi milioni 35 kwa ajili ya kumuwania Nicolas Gaitain, ingawa Atletico Madrid na Zenit St Petersburg nazo pia zinamuwinda winga huyo wa Benfica.
Chanzo: Record

MSHAMBULIAJI wa Bayer Leverkusen Javier Hernandez anajipanga kujiunga na Arsenal mwishoni mwa msimu wa 2015-2016. Pamoja na klabu hiyo kukataa kumuuza kipindi cha dirisha dogo la usajili Januari lakini Arsenal wao wana uhakika wa kumnsa majira ya kiangazi.
Chanzo: Liverpool Echo

KLABU ya Tottenham Hotspurs ilituma maskauti wake kwenda kushuhudia ushindi wa Mainz dhidi ya Hannover mwishoni mwa wiki iliyopita. Spurs walifanya hivyo kutokana na nia yao ya kutaka kumsajili kiungo wa kimataifa wa Uturuki Yunus Malli.
Chanzo: Tuttomercatoweb.com

KLABU ya Orlando City iko katika mazungumzo na D.C. United ili kupata haki za MLS kwa ajili ya kiungo wa AC Milan Antonio Nocerino ambaye anategemewa baadae kusajiliwa Florida. United ndio waliokuwa wa kwanza kufanya mazungumzo na Nocerino lakini yalivunjika.
Chanzo: Washington Post

KLABU za Manchester City na Manchester United zinatarajiwa kupambana kumfukuzia Neymar majira ya kiangazi ambapo klabu zote mbili zinaripotiwa zitakuwa tayari kumlipa nyota huyo wa Barcelona mshahara wa paundi milioni moja kwa wiki.
Chanzo: The Sun

MOURINHO ADAIWA KUWAAMBIA MARAFIKI ZAKE KUWA ATAKWENDA MAN UNITED.

MARAFIKI na watu wa karibu wa Jose Mourinho wamedai kuwa kocha huyo amewahabalisha kuwa yeye ndio atakayechukua nafasi ya Louis van Gaal katika klabu ya Manchester United. Magazeti ya Uingereza yakiwemo Daily Mail, Daily Star, Daily Mirror na daily Telegraph yote yamewanukuu watu wasiojulikana wanaodaiwa kuwa karibu na Mreno huyo mwenye umri wa miaka 53, wakidai tayari ameshafikia makubaliano na United. Mourinho ambaye amewahi kuzinoa klabu za Real Madrid, Inter Milan na Porto alitimuliwa na Chelsea Desemba mwaka jana lakini katika mahojiano yake ya hivi karibuni amesema atarejea tena kufundisha hivi karibuni. Van Gaal ambaye atakuwa amebakisha mwaka mmoja kabla ya mkataba wake kumalizika ifikapo mwishoni mwa msimu huu, amekuwa akiandamwa na tetesi kuhusu mustakabali wake kutokana na matokeo mabovu ambayo United imekuwa ikipata.

ALLEGRI AKANUSHA TETESI ZA KWENDA CHELSEA.

MENEJA wa klabu ya Juventus, Massimiliano Allegri amekanusha taarifa zilizozagaa zikidai kuwa ndiye anayetarajiwa kuchukua nafasi ya meneja wa muda wa Chelsea Guus Hiddink mwishoni mwa msimu huu. Allegri ambaye aliiongoza Juventus kutinga hatua ya fainali ya michuano ya Ligi ya Mabingwa Ulaya msimu uliopita, ana mkataba unaomalizika Juni mwaka 2017 lakini anatajwa kuongoza katika orodha ya makocha wanaowindwa na Chelsea kuziba nafasi ya Jose Mourinho.  Taarifa nchini Uingereza leo zimedai mmiliki wa Chelsea Roman Abramovic ameondoa uwezekano wa kumchukua Diego Simeone kwasababu hapendezewi na aina ya mchezo anayotumia kocha huyo wa Atletico Madrid. Ingawa kocha wa zamani wa Juventus Antonio Conte naye pia amekuwa akihusishwa katika kinyang’anyiro hicho, lakini nyota imeonekana kumuwakia Allegri kutokana na mafanikio makubwa aliyopata mwaka jana.  Lakini mwenyewe alipohojiwa kuhusiana na suala hilo alikanusha akidai hakuna ukweli wowote katika hilo.

WAKALA WA TURAN AKANUSHA TETESI ZA MTEJA WAKE KUTAKA KWENDA CHINA.

WAKALA wa kiungo wa Barcelona, Arda Turan amekanusha taarifa kuwa mteja wake amepata ofa kutoka China. Taarifa za vyombo vya habari zimedai kuwa klabu ya Beijing Guoan inayoshiriki Ligi Kuu ya China ilikuwa ikijiandaa kutoa ofa ya kumlipa Turan kitita cha euro milioni 20 kwa msimu katika mkataba wa miaka mitano. Nyota huyo wa kimataifa wa Uturuki ndio kwanza ameanza kuitumikia Barcelona Januari toka asajiliwe akitokea Atletico Madrid kwa kitita cha euro milioni 34. Lakini wakala wake Ahmet Bulut amesisitiza kuwa hakuna ofa yeyote kutoka China waliyopata na mteja wake hana mpango wowote wa kuondoka Camp Nou kwasasa. Klabu za China zimekuwa zikitumia kiasi kikubwa cha fedha katika wiki za karibuni kwa kuwanasa Jakcson Martinez, Ramires, Luiz Adriano na Alex Teixeira ambao wote wametokea barani Ulaya kwenda Asia.

MASHABIKI WA DORTMUND WARUSHA VITENESI UWANJANI KUPINGA BEI KUBWA YA TIKETI.

MASHABIKI wa Borussia Dortmund jana wametupa mipira ya tenisi uwanjani wakati wa mchezo wa Kombe la DFB dhidi ya Stuttgart kupinga bei kubwa ya tiketi. Mashabiki hao pia waligoma kuingia uwanjani dakika 20 za kwanza za mchezo huo ambapo Dortmund walishinda mabao 3-1. Mashabiki hao wamedai kutofurahishwa na gharama kubwa za tiketi katika michezo ya Bundesliga. Jumamosi iliyopita mashabiki wa Liverpool nao walitoka nje ya uwanja wa Anfield katika mchezo dhidi ya Sunderland kupinga suala hilohilo la gharama kubwa za tiketi.

ZAMALEK YAMTIMUA MIDO.

KLABU ya Zamalek ya Misri imemtimua kocha wake Ahmed Hossam maarufu kama Mido baada ya kupoteza mchezo wao dhidi ya mahasimu wao wa jiji la Cairo Al Ahly. Zamalek ambao walitandikwa mabao 2-0 katika mchezo huo uliochezwa jana, pia imemtimua mkurugenzi wa michezo Hazem Emam na kumteua Mohamed Salah kluwa kocha wa muda. Mido ambaye pia amewahi kucheza katika klabu ya Tottenham Hotspurs, aliwahi kuwa mshambuliaji wa Zamalek kabla ya kustaafu soka mwaka 2013. Aliteuliwa kuwa kocha wa klabu hiyo Januari mwaka 2014.

Tuesday, February 9, 2016

LIGI KUU UINGEREZA KUTUMIA NEMBO MPYA MSIMU UJAO.

LIGI Kuu ya Uingereza imebainisha muonekano wake mpya ambao utatumika kuanzia msimu wa 2016-2017. Picha ya Simba ndio iliyokuwa ikionekana kama nembo ya ligi hiyo toka ilipozinduliwa mwaka 1992 lakini sasa inatarajiwa kufanyiwa mabadiliko ili kuweka muonekano wa kisasa zaidi. Klabu zote 20 zinazoshiriki ligi hiyo pia zimekubali mikakati mipya ya udhamini ambayo inamaanisha kuwa ligi hiyo haitakuwa tena na jina la mdhamini. Kampuni ya Barclays waliokuwa wadhamini wakuu wa ligi hiyo wameamua kutoongeza mkataba wa udhamini pindi ule wa sasa utakapomalizika mwishoni mwa msimu huu.